- मराठा समाजाला कुणबी प्रमाणपत्र न देता त्यांना स्वतंत्र आरक्षण देण्याची निवेदनातून मागणी.
साखरीटोला-: (रमेश चुटे) ओबीसी, मराठा आरक्षणाला घेऊन सध्या महाराष्ट्रात वातावरण तापलेलं आहे. यातच आता कुणबी समाजाने आक्रमक पवित्रा घेतला असून आपल्या संवैधानिक हक्क आणि अधिकारावरील इतरांचे अतिक्रमण आम्ही खपवून घेणार नाही, शासनाने मराठा समाजाला सरसकट कुणबी प्रमाणपत्र देण्याचा विचारही करू नये, अन्यथा कुणबी समाज रस्त्यावर उतरून महाआंदोलन उभारेल दरम्यान कायदा व सुव्यवस्था बाधित झाल्यास सर्वस्वी जबाबदारी शासनाची राहील असा निवेदनातून थेट महाराष्ट्र शासनाला झणझणीत इशारा देण्यात आला आहे.
- सोमवार, दिनांक 11 सप्टेंबर रोजी महाराष्ट्रीयन कुणबी महासंघ, झाडे कुणबी समाज संघटन, युवा कुणबी समाज सेवा समिती आणि जिल्ह्यातील विविध कुणबी संघटनेच्या प्रतिनिधीनी गोंदिया जिल्हाधिकारी यांच्या मार्फत मुख्यमंत्र्यांना निवेदन पाठविले. यात म्हटलं आहे की, महाराष्ट्र शासनाने मराठा समाजाला सरसकट कुणबी प्रमाणपत्र देण्याची भाषा आणि विचारही करू नये अन्यथा कुणबी समाज आक्रमक भूमिका घेईल. मराठा समाजाला शासनाने स्वतंत्र आरक्षण देऊन त्यांची मागणी पूर्ण करावी, त्यांच्या आरक्षणाला विरोध नाही. परंतु ओबीसी आरक्षणाला डिवचू नये. 60 टक्के पेक्षा अधिक ओबीसी समाज असून केवळ 19 टक्के आरक्षण देऊन आधीच ओबीसी समाजाचे लचके तोडण्याचे काम शासनाकडून केले जात आहे. 19 टक्के आरक्षणाची पूर्तता आणि अमलबजावणी देखील पूर्णपणे होत नाही. जिल्ह्यात नुकत्याच पोलीस पाटील भरतीत ओबीसींना शून्य जागा देऊन भोपळा दाखवण्याचे कट कारस्थान शासन प्रशासनानं केलं त्याचे घाव अजुन मिटलेले नाहीत. जवळपास 350 पेक्षा अधिक जातींचा समावेश असताना पुन्हा अनेक जातींची घुसखोरी करण्याचे कारस्थान रचले जात असल्याने कुणबी आणि संपूर्ण ओबीसी समाजात प्रचंड आक्रोश खदखदत आहे. सरसकट कुणबी प्रमाणपत्र वाटण्याची भाषा शासनाने करू नये अन्यथा गंभीर परिणाम समोर येतील असा इशाराही निवेदनातून देण्यात आला आहे. निवेदन देताना महाराष्ट्रीयन कुणबी समाजाचे जिल्हाध्यक्ष प्रभाकर दोनोडे, युवा कुणबी समाज सेवा समितीचे सचिव प्रा. कमलबापू बहेकार, कोषाध्यक्ष रमेश चुटे, राष्ट्रीय ओबीसी युवा महासंघाचे जिल्हाध्यक्ष चंद्रकुमार बहेकार, झाडे कुणबी समाज संघटनेचे जिल्हा सचिव नीलेश चुटे, संघटन सचिव कुंदा दोनोडे, सुजाता बहेकार, राधाकिशन चुटे, देवरी संघटनेचे प्रतिनिधी राम गायधने,सहित ईतर प्रतिनिधी उपस्थित होते.
